O peche de varios medios nacionalistas deu lugar agora a un manifesto que esixe axudas públicas para ditos medios, baixo a idea de que pechan por estar en galego, e non pola súa descarada afinidade a sectores ideolóxicos nacionalistas cada vez máis minoritarios en Galicia e, por tanto, cunha escasa demanda no mercado.

Se veñen de pechar medios como Vieiros ou a versión impresa do semanario A Nosa Terra será pola xestión que fixeron os seus donos das cuantiosas subvencións que lles asignou o BNG dende a Xunta durante catro anos, e tamén porque ditos medios estaban enfocados a un público nacionalista e polo tanto minoritario. Que os nacionalistas lle boten á culpa dos seus fracasos ó galego di moito da pouca estima que lle teñen a esta lingua. Pero o peor non é iso. O peor é que pretenden que por elexir unha das dúas linguas oficiais de Galicia eles deben ser privilexiados polas administracións, e os que elixen a outra lingua oficial deben ser discriminados e non contar con ningunha axuda. Curiosa idea da liberdade e da igualdade.

O máis gracioso é que o citado manifesto di o seguinte: “Os únicos que realmente poden garantir o futuro de calquera medio son os lectores, as audiencias e os anunciantes.” ¿Non é un contrasentido, entón, pedir axudas públicas? Ademáis, o texto faille un reproche ós galegos, queixándose de que “non hai nin lectores nin anunciantes para os medios que se fan en galego”. Me temo que para o que non hai nin lectores nin anunciantes é para medios panfletarios nacionalistas. Uns panfletos, dito sexa de paso, que lle fan un fraco favor á lingua galega, identificándoa cos seus plantexamentos ideolóxicos excluintes e intolerantes. Se tanto aman a lingua galega, que deixen de botarlle a culpa dos erros que eles cometen, que deixen de aspirar a vivir do diñeiro do contribuinte, e que orienten á súa promoción dende a tolerancia e o respeto á diversidade lingüística de Galicia é á liberdade individual de cada galego para elexir á lingua na que quere escolarizar ós seus fillos ou facer ós seus negocios. E se mesmo así os galegos prefiren comprar medios en castelán, están no seu dereito. Xa está ben de querer correxir as eleccións persoais da xente a base de privilexios e discriminacións.

08.09.10 18:33 5