A restauración dos dous canóns navais rusos de 1817 do Castelo do Castro, en Vigo

Un dos lugares históricos de Vigo recuperou recentemente a súa imaxe de outrora con dúas bicentenarias pezas de artillería.

Saínte de Coia, a pouco coñecida historia do miradoiro máis popular da cidade de Vigo
Unha serie de fotos dun manto de néboa adentrándose na Ría de Vigo á noitiña

Estes dous canóns levan moitos anos colocados a ambos os dous lados da porta principal do segundo recinto do castelo (lembremos que antigamente esta fortaleza tiña tres recintos fortificados, o terceiro dos cales foi eliminado, como xa expliquei aquí en 2013).

Un panel informativo situado preto dos canóns explica a súa historia: "Canóns navais rusos procedentes dunha compra de barcos de guerra do rei español Fernando VII ó Zar Alejandro I en 1817. Tras desartillar os buques, os canons foron reutilizados para a defensa das fortalezas costeiras repartidas por toda España, chegando a Vigo estas dúas pezas. A cureña é orixinal e de procedencia inglesa, das utilizadas no século XVIII e XIX." Polo que publicaron diversos medios, estes canóns navais rusos foron utilizados en posicións fortificadas en Vigo, Cádiz, Ferrol e Cartaxena. Segundo Diego Quevedo Carmona, 630 destes canóns chegaron a España, dos cales só se conservan 18 nas citadas cidades.

Estes canóns son moi populares entre os veciños de Vigo e os turistas que veñen á cidade. Creo que moitos vigueses podemos dicir que nalgún momento da nosa infancia montámonos encima deles. Obviamente, recibir o cariño de tanta xente, alén do feito de estar á intemperie, sufrindo o vandalismo e sen o necesario coidado, conlevou unha deterioración co paso dos anos. As dúas fotos que podedes ver arriba foron tomadas o 5 de febreiro de 2015. A cureña do canón da dereita (na primeira foto) estaba xa bastante gastada, e o canón da esquerda (sobre estas liñas) tiña as rodas rotas.

Aquí podemos ver dúas fotos tomadas o 24 de febreiro de 2024 nas que vemos os escudos imperiais rusos dos canóns. Vemos o escudo do canón da dereita sobre estas liñas e o do canón da esquerda a continuación.

As seguintes dúas fotos foron tomadas o 7 de novembro de 2025. Como vemos, o paso do tempo estaba a afectar especialmente nas cureñas, que xa tiñan todas as súas rodas rotas.

Hai uns días foron presentados os canóns xa restaurados. A restauración, custeada polo Concello de Vigo, custou 33.000 euros. Como se ve, as cureñas orixinais foron conservadas e #reconstruír as rodas.

Aquí podemos ver con detalle o canón da dereita:

E aquí podemos ver con detalle o canón da esquerda:

Podedes ver a serie completa de fotos na miña conta de Flickr.