Berrogüetto en Pontevedra

Onte á noite fun na capital provincial a un concerto dun dos meus grupos favoritos de música folk: Berrogüetto. Alí grabei este vídeo do seu tema "Gali@matías.tacom", aparecido no seu disco "Hepta" no ano 2001.

Berrogüetto: música e arte, xuntas
Berrogüetto. "Setestrelo"
Berrogüetto. "Fusco"

Dende o seu primeiro disco, "Navicularia", lanzado en 1996, Berrogüetto publicou algunhas das mellores cancións galegas que coñezo: "Fusco", "Nadal de Luintra" e sen dúbida a miña favorita: "Setestrelo". Teño á súa música asociada a moitas lembranzas: concertos cos amigos, paseos, noites en vela e mesmo unha boda na que os noivos escolleron o seu "Fusco" como canción especial. Confeso que boto un pouco de menos a voz de Guadi Galego, a súa antiga vocalista. Con todo, o seu concerto en Pontevedra foi un bo reencontro cun son potente, ó mesmo tempo tradicional, novo e orixinal. Unha vez máis vin a Anxo Pintos amosando que é capaz de tocar todo o que lle poñan: unha gaita, un violín, unha zanfoña... Certamente, é todo un xenio nisto da música, xa sexa como instrumentista ou como compositor.

Polo que respecta ó concerto, gustaríame ter disposto de máis iluminación para facer mellores fotos. Fai xa anos que non quedaba tan insatisfeito coas fotos tomadas nun concerto: de case 300 que fixen, apenas se salvaron 24. Déixovos con elas: