BNG, unha mafia que xa coloca na súa diana a todos os galegos que aman a España

A esquerda leva moitos anos chamando "fascistas" a todos os que non opinan como ela, nun intento de demonizar calquera discrepancia.

O BNG non condena a violencia contra Vox e mesmo a utiliza con fins electorais
Violencia de ultraesquerda na Coruña co fin de impedir a Vox expresarse libremente

Onte comentei aquí que o fascismo naceu como un socialismo nacionalista. Foi un movemento antiliberal e antidemocrático que consideraba que as súas ideas lle lexitimaban para exercer a violencia contra os seus rivais políticos, co fin nada disimulado de establecer unha ditadura na que ninguén puidese discrepar da elite fascista (exactamente o mesmo que a elite comunista fixo en Rusia).

Unhas horas despois, a extrema esquerda ofreceu unha exhibición de auténtico fascismo na Coruña, recorrendo ó acoso e a violencia para intentar impedir que un partido democrático, Vox, puidese expresar as súas ideas nunha comunidade autónoma na que esa organización política é xa o cuarto partido máis votado.

O Bloque Nacionalista Galego (BNG) non só se negou a condenar esa violencia, senón que as súas mocidades, Galiza Nova, ameazaron con máis. Non é a primeira vez que vemos esas actitudes mafiosas neses antros da extrema esquerda. En febreiro, o BNG negouse a condenar unha serie de ataques a sedes do Partido Popular (PP). Non lle bastou con rexeitar ese xesto de decencia democrática, senón que ademais se mofou dese partido acusándolle de "choromiqueo" e de "victimismo", unha actitude propia dunha banda de matóns.

Por se alguén se esqueceu xa daquilo, é o mesmo BNG que en 2013 negouse a condenar á banda terrorista Resistencia Galega en 58 concellos, despois de numerosos atentados dese grupo criminal que -casualmente- era separatista e de extrema esquerda, como o Bloque. É o mesmo BNG que todos os anos presume do apoio dun grupo terrorista antisemita que asasinou a moitas persoas polo mero feito de ser xudías. Eses son os que agora veñen chamando "fascistas" ós seus rivais políticos.

Hai que lembrar que o BNG naceu a partir do chamado Bloque Nacional-Popular Galego (BNPG), creado en 1981 como unha coalición entre un partido comunista maoísta, a Unión de Povo Galego (UPG) e o Partido Socialista Galego (PSG). Moitas veces pregunteime se o de "Nacional-Popular" elixírono porque "Nacional-Socialista" xa estaba collido por outros, porque a final de contas é un termo que define ben a un socialismo nacionalista como o do BNG. Como xa expliquei aquí hai uns días, ata 1985 o BNG foi o socio galego de Herri Batasuna (HB), o brazo político da banda terrorista ETA. Sobre o carácter táctico da ruptura entre ambos os partidos, basta con lembrar que en setembro 2000 o BNG negouse a subscribir unha declaración de condena do terrorismo de ETA no Parlamento Europeo.

Non está de máis lembrar estas cousas para non finxir sorpresa ante imaxes como esta: onte, os cachorros do BNG, Galiza Nova, chamaban a romper España dun puñetazo co lema "fora españolistas das nosas rúas", que deixa moi claro a concepción antidemocrática que estes tipos teñen da política. A RAE define "españolismo" como "amor ou apego ó español", un amor compartido pola maioría dos galegos, xa que nos sentimos españois e amamos ó noso país. Así pois, o BNG pretende impedir que a maioría dos galegos poidamos saír á rúa simplemente porque non opinamos como esa minoría intolerante.

Con esas actitudes antidemocráticas, o BNG e os seus cachorros compórtanse como unha mafia que pretende converter nosa amada terra galega nunha ditadura, unha enorme prisión na que quen non pensemos como eles nin sequera teremos dereito de pisar as beirarrúas que pagamos cos nosos impostos. Hai que lembrar que nunha democracia non vale todo: existen unhas normas de convivencia que obrigan a todos. En España esas normas están plasmadas na Constitución Española, aprobada en referendo por unha amplísima maioría de españois. O Artigo 6 da Constitución di:

"Os partidos políticos expresan o pluralismo político, concorren á formación e manifestación da vontade popular e son instrumento fundamental para a participación política. A súa creación e o exercicio da súa actividade son libres dentro do respecto á Constitución e á lei. A súa estrutura interna e funcionamento deberán ser democráticos".

A estas alturas xa é evidente que o BNG non é un partido democrático, porque se o fose respectaría ese pluralismo político e o dereito dos cidadáns con distintas formas de pensar a ser representados por partidos que defendan as súas ideas por medios pacíficos e democráticos, e non como os salvaxes de extrema esquerda que onte feriron a 12 policías na Coruña, sen que o Bloque emitise nin a máis leve crítica a esas agresións. Se o BNG non é un partido democrático, se se nega a condenar a violencia e se actúa como unha mafia, ¿por que segue sendo legal? En España xa foron ilegalizados outros partidos políticos totalitarios, con toda a razón, porque apoiaban a violencia e non respectaban as nosas normas de convivencia. A democracia non pode dar barra libre a quen quere destruíla.

---

Fotos: Galiza Nova.