Un asalto da Armada Española en Vigo con apoio de cazas Harrier II Plus e helicópteros

O pasado venres, con motivo do Día das Forzas Armadas, houbo unha gran demostración dinámica na praia de Samil, en Vigo.

Un caza Harrier II da Armada Española salpicando de auga á xente en Vigo
Unha espectacular exhibición con helicópteros militares NH90 e SH-60B a baixa altura en Vigo

Neste evento, a Armada Española fixo unha demostración de asalto á praia por mar e aire, utilizando lanchas rápidas semirrígidas Milpro SRMN 600 do Grupo de Movilidade Anfibia (GRUMA), lanchas de desembarco LCM-1E do Grupo Naval de Praia e soldados e vehículos VAMTAC do Tercio de Armada (TEAR), procedentes do portaaeronaves anfibio "Juan Carlos I" L-61, que estaba en augas da Ría de Vigo.

Este asalto contou co apoio aéreo de dous cazas EAV-8B+ Harrier II Plus da 9ª Escuadrilla, dous helicópteros antisubmarinos SH-60B Seahawk da 10ª Escuadrilla e dous helicópteros lixeiros H135 P3H Nival da 12ª Escuadrilla. Hai dous anos xa houbo unha demostración de desembarco da Armada na mesma praia, pero con menos medios aéreos.

Baixo estas liñas podedes ver un vídeo que mostra como foi este exercicio de asalto, seguido desde o paseo e desde o areal da citada praia por miles de persoas:

Podedes ver aquí algunhas fotos desta exhibición de asalto. Hai máis fotos na miña conta de Flickr.

Un helicóptero SH-60B Seahawk da 10ª Escuadrilla lanzando bengalas ó aproximarse á praia. As bengalas son utilizadas como un reclamo para desviar mísiles superficie-aire (SAM) con guía infravermella, xa que estas armas van en busca de fontes de calor como os motores do helicóptero.

Dúas lanchas de desembarco LCM-1E sucando a Ría de Vigo cara á praia de Samil. Vemos o fondo unha das fragatas F-100 da Armada Española e á dereita un patrulleiro oceánico da Garda Civil.

Un helicóptero SH-60B Seahawk da 10ª Escuadrilla armado cunha metralladora GAU-16 de calibre 12,7 mm no seu portón para proporcionar lume de apoio á forza de desembarco.

Cinco vehículos tácticos VAMTAC ST5 xa na praia de Samil. No centro vemos unha unidade da versión portamorteros ST5-MSV cun morteiro Eimos de 81 mm.

Un helicóptero lixeiro H135 P3H Nival da 12ª Escuadrilla, levando a bordo a soldados do TEAR.

Dous helicópteros lixeiros H135 P3H Nival da 12ª Escuadrilla chegando á praia de Samil durante o asalto.

Un caza EAV-8B+ Harrier II Plus da 9ª Escuadrilla facendo unha pasada rápida a baixa altura sobre a praia de Samil.