As imaxes dunha noite de San Xoán nunha das parroquias costeiras de Vigo

Hoxe é o día de San Xoán Bautista, unha xornada durante a cal Galicia vive unha antiga tradición de facer fogueiras á medianoite.

Un espectacular ocaso a cámara rápida no pequeno paraíso da Ría de Vigo
Saínte de Coia, a pouco coñecida historia do miradoiro máis popular da cidade de Vigo

Onte tiven a oportunidade de vivir esta tradición en Coruxo, unha das parroquias costeiras da cidade de Vigo. Ano tras ano, esa parroquia organiza unha fogueira veciñal na chaira que hai xunto á bonita Capela da Virxe do Carme do Vao, un pequeno templo de pedra construído en 1952 e obra do arquitecto Antonio Román Conde. Nas imaxes podemos ver algunhas dos costumes desta celebración, como saltar a fogueira (por motivos de seguridade faise unha fogueira máis pequena ó carón para isto), así como estudantes tirando os seus apuntamentos ás chamas unha vez finalizado o curso.

Este ano se puido ver moita xente nas fogueiras de Vigo xa que é día festivo en toda Galicia (moveuse o festivo do día das Letras Galegas, xa que este coincidiu en domingo). Outros anos nesta fogueira de Coruxo escoitábase música de gaitas, o cal era moi bonito, pero esta vez optaron por un DJ poñendo música actual, o cal atraeu a moitos novas. Persoalmente, quedo coas gaitas.

É a primeira noite de San Xoán sen o meu pai, aínda que sei que el estaba connosco en certo xeito. Foron moitos anos seguindo esta tradición con el e en cada sitio no que estivemos xuntos o seu recordo está especialmente vivo para nós.