O Exército e a Armada na procesión do Santo Enterro da cidade de Pontevedra

Un ano máis, este Venres Santo celebrouse a procesión do Santo Enterro na cidade de Pontevedra, con acompañamento militar.

A Semana Santa en miniatura organizada por un histórico comercio de Pontevedra
Os Catro Pasos de Gondomar, unha sobria e bela procesión ás escuras na Galicia rural

Desde hai moitos anos, esta procesión conta coa participación do Exército de Terra e da Armada, alén de incluír unha representación da Garda Civil e da Policía Local de Pontevedra. Esta procesión reúne ás sete confrarías da cidade, que conta cunha das maiores celebracións. Podedes ver aquí unha serie de fotos da procesión que publiquei na miña conta de Flickr. Podedes ver as fotos ampliadas pulsando sobre cada imaxe.

Confraría do Amor Hermoso de Campolongo. Os seus confrades visten carapucha e capas moradas e túnica branca, e portan o paso da A nosa Señora do Amor Hermoso. A confraría foi fundada en 1997. Conta cunha banda de música propia. É a máis nova das confrarías pontevedresas, ten a súa sede na Igrexa de San José e é a confraría que abre a procesión.

Confraría do Cortpo Santo do Gremio de Mareantes. Os seus membros visten unha túnica branca con carapucha e capa negras, e acompaña ó paso de Cristo Crucificado. Este gremio foi fundado na Idade Media e é na actualidade o gremio de mar máis antigo de España. Só admite a membros de familias vinculadas ó mar, tanto pola Armada como pola Mariña civil. A confraría do Gremio de Mareantes foi fundada inicialmente en 1924, aínda que a súa actual etapa iniciouse en 2007. A cruz que encabeza a confraría inclúe varias reliquias.

Banda de Guerra da Brigada "Galicia" VII (BRILAT) do Exército de Terra. Tradicionalmente acompaña ó Gremio de Mareantes na procesión. Esta Brigada ten a súa base principal en Figueirido (Pontevedra). Nas imaxes vemos os seus soldados coa boina gris, a peza distintiva da BRILAT, adornada cun azor.

Confraría da nosa Nai da Maior Dor. É unha confraría maioritariamente feminina. As mulleres desta confraría levan mantilla negra española e, nalgúns casos, túnica e carapucha negra. Foi fundada na década de 1950.

Confraría do noso Pai Xesús do Silencio. Os seus cofraden visten carapucha branca, túnica negra e capa alaranxada e acompañan ó paso da nosa Señora das Angustias. A confraría foi creada en 1952 por estudantes pontevedreses residentes en Santiago de Compostela, por iso as súas capas locen unha Cruz de Santiago de cor vermella. A confraría ten unha banda de tambores.

Escola Naval Militar (ENM). A academia de oficiais da Armada Española acompaña á Confraría do noso Pai Xesús do Silencio nesta procesión. Vemos a dous oficiais acompañando o paso e á banda de música da ENM, formada por membros do Cuerpo de Infantería de Marina, a continuación.

Confraría do noso Pai Xesús coa Cruz ó Lombo. Os seus membros visten carapucha negra, túnica branca e capa vermella. A confraría foi creada en 1949 por excombatientes da Guerra Civil española, motivo polo cal o seu paso, o de Cristo Yaciente, leva os emblemas dos tres Exércitos (abaixo, na terceira foto, vemos o emblema da Armada nun dos lados). Desde 1992 esta confraría ten unha banda de tambores, cornetas e gaitas.

Confraría da Veracruz e Misericordia. Os seus confrades visten carapucha morada cunha cruz potenzada verde e túnica negra. A confraría porta o paso da Virxe da Misericordia, escoltado pola Garda Civil. A confraría ten unha banda de tambores, gaitas e cornetas.

Confraría do Espírito Santo. Os seus membros visten carapucha e capa brancas e túnica granate e acompañan o paso da Santa Cruz. A confraría foi fundada en 1952 e é coñecida como a "Confraría do Instituto", pois está formada por alumnos e exalumnos do Instituto de Pontevedra. Ten a súa sede no Centro Parroquial de Santa María e posúe unha banda de cornetas, tambores e gaitas.

Lignum-Crucis da Basílica de Santa María a Maior. É unha reliquia da Santa Cruz na que Cristo foi crucificado. É levada na procesion baixo palio e escoltada por seis membros da Policía Local de Pontevedra con uniformes de gala.

Aquí unha última foto do regreso da procesión pola rúa Michelena en dirección á Basílica de Santa María a Maior. A Semana Santa de Pontevedra é certamente espectacular e, ademais, lévase a cabo nunha cidade cuxo centro histórico é moi agradable para pasear. Recoméndovola.