O programa do Día das Forzas Armadas de España 2026, que se celebrará en Vigo

A finais de maio, a cidade de Vigo acollerá por primeira vez na súa historia os actos centrais do Día das Forzas Armadas de España.

O Exército e a Armada na procesión do Santo Enterro da cidade de Pontevedra
'Santiago', un alegre pasodobre galego que hoxe é unha marcha militar do Exército Español

O programa dos actos foi anunciado hoxe en Vigo polo Xefe de Estado Maior da Defensa (JEMAD), o Almirante Xeral Teodoro Esteban López Calderón, nun acto celebrado na Comandancia Naval de Vigo. López Calderón destacou que "con esta celebración preténdese dar a coñecer á cidadanía o traballo que os militares, incluídos os pertencentes á Garda Civil, realizamos dentro e fóra das nosas fronteiras, o noso labor permanente de vixilancia e protección do territorio e espazos de soberanía e interese nacional, así como de defensa da paz e a liberdade no mundo".

Os actos centrais do Día das Forzas Armadas desenvolveranse do 26 ó 31 de maio. O desfile terrestre e aéreo celebrarase o 30 de maio no paseo da Praia de Samil. Este desfile contará coa participación dos tres exércitos e 130 vehículos, 46 avións e 25 helicópteros. Os eventos que terán lugar na cidade son estes:

• Do 26 ó 31 de maio, Porto de Vigo: presencia naval e exposición estática de material.
• 27 de maio, 19.00 horas. Estadio de Balaídos: exhibición de persoal e material.
• 28 de maio, 19.15 horas. Porta do Sol: encontro de músicas militares, con sete Unidades de Música das Forzas Armadas que farán previamente un pasacalles ata confluír nesa praza.
• 29 de maio, 15.30 horas. Ría de Vigo: revista naval presidida por S.M. o Rei Felipe VI, coa participación de buques da Armada e da Garda Civil.
• 29 de maio, 17.15 horas. Praia de Samil: exhibición dinámica de persoal e material. Incluirá unha exhibición ecuestre e outra de guías caninos.
• 30 de maio, 12.00 horas. Praia de Samil: acto central do Día das Forzas Armadas. Haberá un izado e homenaxe á Bandeira Nacional, unha homenaxe ós que deron a súa vida por España e un desfile terrestre e aéreo.

Como veciño de Vigo, síntome orgulloso de que a miña cidade vaia acoller estes actos. É unha honra para os vigueses poder celebrar o Día das Forzas Armadas nas súas rúas, na súa ría e no seu porto. Por suposto, teredes máis información sobre estes actos en Contando Estrelas. Espero poder cubrilos todos, é unha oportunidade histórica poder facelo sen saír da miña cidade.

---

Foto principal: Casa Real.